ಗುಜರಾತ್ : ಇಲ್ಲಿನ ಅಹಮದಾಬಾದ್ನಲ್ಲಿ ಜೂನ್ 4 ರಿಂದ ಜೂನ್ 8 ರವರೆಗೆ ಆಯೋಜಿಸಲಾಗಿರುವ ಪ್ರಥಮ ವಿಶ್ವ ಯೋಗಾಸನ ಚಾಂಪಿಯನ್ಶಿಪ್-2026 ಕ್ಕೆ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ವರ್ಚುವಲ್ (ವಿಡಿಯೋ ಕಾನ್ಫರೆನ್ಸ್) ಮೂಲಕ ಚಾಲನೆ ನೀಡಿದರು. ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ಅಹಮದಾಬಾದ್ ನ ನೆಲದಿಂದ ವಿಶ್ವದ ಕ್ರೀಡಾ ಪರಂಪರೆಗೆ ಹೊಸ ಅಧ್ಯಾಯವೊಂದು ಸೇರ್ಪಡೆಯಾಗುತ್ತಿದೆ. ಈ ಸ್ಪರ್ಧೆಯು ಯೋಗಾಸನವನ್ನು ಒಂದು ಸ್ಪರ್ಧಾತ್ಮಕ ಕ್ರೀಡೆಯನ್ನಾಗಿ ಜಾಗತಿಕ ಮಟ್ಟದಲ್ಲಿ ಗುರುತಿಸುವಂತೆ ಮಾಡುವಲ್ಲಿ ಪ್ರಮುಖ ಹೆಜ್ಜೆಯಾಗಲಿದೆ ಎಂದರು.
ವಿಶ್ವ ಯೋಗ ದಿನಕ್ಕೂ ಮುನ್ನ ಆರೋಗ್ಯ ಮತ್ತು ವೆಲ್ನೆಸ್ ನ ಮಹಾಕುಂಭ
ಚಾಂಪಿಯನ್ ಶಿಪ್ ನಲ್ಲಿ ಭಾಗವಹಿಸಲು ಭಾರತಕ್ಕೆ ಆಗಮಿಸಿರುವ ವಿವಿಧ ದೇಶಗಳ ಸ್ಪರ್ಧಿಗಳನ್ನು ಪ್ರಧಾನಿ ಆತ್ಮೀಯವಾಗಿ ಸ್ವಾಗತಿಸಿದರು. ಯುನೆಸ್ಕೋ ವಿಶ್ವ ಪರಂಪರೆಯ ನಗರವಾದ ಅಹಮದಾಬಾದ್ನಲ್ಲಿ ಈ ಆಯೋಜನೆ ನಡೆದಿರುವುದು ಇಡೀ ದೇಶಕ್ಕೆ ಹೆಮ್ಮೆಯ ವಿಷಯವಾಗಿದೆ ಎಂದು ಅವರು ಹೇಳಿದರು. ಅಂತಾರಾಷ್ಟ್ರೀಯ ಯೋಗ ದಿನಕ್ಕೂ ಮುನ್ನ ನಡೆಯುತ್ತಿರುವ ಈ ಸ್ಪರ್ಧೆಯು ಆರೋಗ್ಯ ಮತ್ತು ವೆಲ್ನೆಸ್ನ “ಡಬಲ್ ಡೋಸ್” ಇದ್ದಂತೆ ಎಂದು ಅವರು ಬಣ್ಣಿಸಿದರು.
ಯೋಗಕ್ಕೆ ಜಾಗತಿಕ ಮನ್ನಣೆ ಸಿಕ್ಕ ಪ್ರಯಾಣದ ಉಲ್ಲೇಖ
ಒಂದು ದಶಕದ ಹಿಂದೆ ಭಾರತವು ವಿಶ್ವಸಂಸ್ಥೆಯಲ್ಲಿ ಅಂತಾರಾಷ್ಟ್ರೀಯ ಯೋಗ ದಿನದ ಪ್ರಸ್ತಾಪವನ್ನು ಮಂಡಿಸಿತ್ತು ಎಂದು ಪಿಎಂ ಮೋದಿ ನೆನಪಿಸಿಕೊಂಡರು. ಭಾರತದ ಉದ್ದೇಶ ತನ್ನ ಪ್ರಾಚೀನ ಸಂಪ್ರದಾಯವನ್ನು ಇಡೀ ಮಾನವಕುಲದ ಆರೋಗ್ಯ ಮತ್ತು ಸಾಮೂಹಿಕ ಕಲ್ಯಾಣದೊಂದಿಗೆ ಜೋಡಿಸುವುದಾಗಿತ್ತು. ವಿಶ್ವಸಂಸ್ಥೆಯಲ್ಲಿ 190 ದೇಶಗಳು ಈ ಪ್ರಸ್ತಾಪವನ್ನು ಬೆಂಬಲಿಸಿದ್ದವು ಎಂದು ಅವರು ತಿಳಿಸಿದರು. ಇಂದು ಕೋಟ್ಯಂತರ ಜನರು ಯೋಗ, ಧ್ಯಾನ ಮತ್ತು ಪ್ರಾಣಾಯಾಮವನ್ನು ತಮ್ಮ ಜೀವನಶೈಲಿಯ ಭಾಗವಾಗಿಸಿಕೊಂಡಿರುವುದೇ ಈ ಉಪಕ್ರಮದ ಯಶಸ್ಸಿಗೆ ಸಾಕ್ಷಿಯಾಗಿದೆ ಎಂದರು.
ಕ್ರೀಡೆಯಾಗಿ ಯೋಗಾಸನಕ್ಕೆ ಹೊಸ ಗುರುತು
ಪ್ರತಿಯೊಂದು ಸಜೀವ ಪರಂಪರೆಯು ಕಾಲಾನಂತರದಲ್ಲಿ ಹೊಸ ಹಂತವನ್ನು ಪ್ರವೇಶಿಸುತ್ತದೆ ಮತ್ತು ಈ ವಿಶ್ವ ಯೋಗಾಸನ ಚಾಂಪಿಯನ್ಶಿಪ್ ಆ ಹೊಸ ಹಂತದ ಸಂಕೇತವಾಗಿದೆ ಎಂದು ನರೇಂದ್ರ ಮೋದಿ ಹೇಳಿದರು. ಭವಿಷ್ಯದಲ್ಲಿ ಯೋಗಾಸನವು ಅಂತಾರಾಷ್ಟ್ರೀಯ ಕ್ರೀಡಾಕೂಟಗಳಲ್ಲಿ ತನ್ನದೇ ಆದ ಸ್ಥಾನವನ್ನು ಪಡೆದುಕೊಳ್ಳುತ್ತದೆ ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದರು. ಒಲಿಂಪಿಕ್ಸ್ ಅಥವಾ ಇತರ ಬಹು-ಕ್ರೀಡಾಕೂಟಗಳಲ್ಲಿ ಯೋಗಾಸನವನ್ನು ಸೇರಿಸುವ ನಿಟ್ಟಿನಲ್ಲಿ ಈ ಸ್ಪರ್ಧೆಯು ಪ್ರಮುಖ ಪಾತ್ರ ವಹಿಸಲಿದೆ ಎಂದರು.
ಉದ್ಯೋಗ ಮತ್ತು ಅವಕಾಶಗಳ ಹೊಸ ಪರಿಸರ ವ್ಯವಸ್ಥೆ (Ecosystem)
ಯಾವುದೇ ದೊಡ್ಡ ಕ್ರೀಡೆಯೊಂದಿಗೆ ವ್ಯಾಪಕವಾದ ಪರಿಸರ ವ್ಯವಸ್ಥೆಯು ಅಭಿವೃದ್ಧಿಗೊಳ್ಳುತ್ತದೆ, ಇದು ಉದ್ಯೋಗ ಮತ್ತು ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತದೆ ಎಂದು ಪ್ರಧಾನಿ ಹೇಳಿದರು. ಯೋಗಾಸನವು ಕ್ರೀಡೆಯಾಗಿ ವಿಸ್ತರಿಸುವುದರಿಂದ ಕ್ರೀಡಾಪಟುಗಳು, ತರಬೇತುದಾರರು, ಕ್ರೀಡಾ ವಿಜ್ಞಾನಿಗಳು, ಸಂಶೋಧಕರು ಮತ್ತು ಈವೆಂಟ್ ಮ್ಯಾನೇಜರ್ಗಳಿಗೆ ಹೊಸ ಸಾಧ್ಯತೆಗಳು ಮುಕ್ತವಾಗಲಿವೆ. ಇದರಿಂದ ಆರೋಗ್ಯ ಮತ್ತು ಕ್ರೀಡೆ ಎರಡೂ ಕ್ಷೇತ್ರಗಳಿಗೆ ಲಾಭವಾಗಲಿದೆ.
‘ಯೋಗ ಫಾರ್ ಹೆಲ್ತಿ ಏಜಿಂಗ್’ ಥೀಮ್ಗೆ ಒತ್ತು
ಜೂನ್ 21 ರಂದು ಆಚರಿಸಲಾಗುವ ಅಂತಾರಾಷ್ಟ್ರೀಯ ಯೋಗ ದಿನದ ಸಿದ್ಧತೆಗಳಲ್ಲಿ ಇಡೀ ಜಗತ್ತು ತೊಡಗಿರುವ ಸಮಯದಲ್ಲಿ ಈ ಸ್ಪರ್ಧೆಯನ್ನು ಆಯೋಜಿಸಲಾಗುತ್ತಿದೆ ಎಂದು ಪಿಎಂ ಮೋದಿ ಹೇಳಿದರು. ಈ ವರ್ಷದ ಯೋಗ ದಿನದ ಘೋಷವಾಕ್ಯವನ್ನು (Theme) “ಯೋಗ ಫಾರ್ ಹೆಲ್ತಿ ಏಜಿಂಗ್” ( ಆರೋಗ್ಯಕರ ವೃದ್ಧಾಪ್ಯಕ್ಕಾಗಿ ಯೋಗ) ಎಂದು ಇಡಲಾಗಿದೆ. ಜನರು ದೀರ್ಘಕಾಲದವರೆಗೆ ಆರೋಗ್ಯಕರವಾಗಿ ಮತ್ತು ಸಕ್ರಿಯವಾಗಿರಲು ಮಾರ್ಗಗಳನ್ನು ಹುಡುಕುತ್ತಿದ್ದಾರೆ ಮತ್ತು ಯೋಗವು ಇದಕ್ಕೆ ಅತ್ಯಂತ ಪರಿಣಾಮಕಾರಿ ಮಾಧ್ಯಮವಾಗಿದೆ. ಯೋಗವು ವ್ಯಕ್ತಿಯನ್ನು ರೋಗ ಮತ್ತು ಭೋಗ ಎರಡರಿಂದಲೂ ಮುಕ್ತಗೊಳಿಸಲು ಸಹಾಯ ಮಾಡುತ್ತದೆ ಹಾಗೂ ಕಡಿಮೆ ವೆಚ್ಚದಲ್ಲಿ ಉತ್ತಮ ಜೀವನಶೈಲಿಯನ್ನು ನೀಡುತ್ತದೆ ಎಂದರು.
‘ಯೋಗ 365’ ರಾಯಭಾರಿಗಳಾಗಲು ಕರೆ
ಭಾರತ ಸರ್ಕಾರದ ಆಯುಷ್ ಸಚಿವಾಲಯವು “ಯೋಗ 365” ಅಭಿಯಾನವನ್ನು ಪ್ರಾರಂಭಿಸಿದೆ ಎಂದು ಪ್ರಧಾನಿ ತಿಳಿಸಿದರು. ಭಾಗವಹಿಸುವ ಎಲ್ಲಾ ಸ್ಪರ್ಧಿಗಳು ತಮ್ಮ ತಮ್ಮ ದೇಶಗಳಿಗೆ ಮರಳಿದ ನಂತರ ಯೋಗದ ಸಂದೇಶವನ್ನು ಇನ್ನಷ್ಟು ಮುನ್ನಡೆಸಬೇಕೆಂದು ಅವರು ಮನವಿ ಮಾಡಿದರು. ಕ್ರೀಡಾಪಟುಗಳು ತಮ್ಮ ಅನುಭವ ಮತ್ತು ವಿಶ್ವಾಸದ ಮೂಲಕ ಪ್ರಪಂಚದಾದ್ಯಂತ ಯೋಗದ ರಾಯಭಾರಿಗಳಾಗಬಹುದು ಮತ್ತು ಹೆಚ್ಚಿನ ಜನರನ್ನು ಇದರೊಂದಿಗೆ ಜೋಡಿಸಬಹುದು ಎಂದರು.
ಸ್ಪರ್ಧಿಗಳನ್ನು ಈಗಾಗಲೇ ‘ಚಾಂಪಿಯನ್ಸ್’ ಎಂದು ಬಣ್ಣಿಸಿದ ಪ್ರಧಾನಿ
ತಮ್ಮ ಭಾಷಣದ ಕೊನೆಯಲ್ಲಿ ಪ್ರಧಾನಮಂತ್ರಿಯವರು, ಈ ಸ್ಪರ್ಧೆಯಲ್ಲಿ ಯಾರು ಗೆದ್ದರೂ, ಇದರಲ್ಲಿ ಭಾಗವಹಿಸುತ್ತಿರುವ ಪ್ರತಿಯೊಬ್ಬ ಆಟಗಾರನೂ ಈಗಾಗಲೇ ಒಬ್ಬ ಚಾಂಪಿಯನ್ ಆಗಿದ್ದಾನೆ ಎಂದು ಹೇಳಿದರು. ಸ್ಪರ್ಧಿಗಳ ಪ್ರತಿಭೆ, ಶಿಸ್ತು ಮತ್ತು ಸಮರ್ಪಣಾ ಮನೋಭಾವವು ಪ್ರಪಂಚದಾದ್ಯಂತದ ಯುವಕರಿಗೆ ಪ್ರೇರಣೆ ನೀಡುತ್ತದೆ ಎಂದರು. ಇದೇ ವೇಳೆ ಅವರು ಪ್ರಥಮ ವಿಶ್ವ ಯೋಗಾಸನ ಚಾಂಪಿಯನ್ ಶಿಪ್-2026 ಅಹಮದಾಬಾದ್ ಓಪನ್ನ ಅಧಿಕೃತ ಉದ್ಘಾಟನೆಯನ್ನು ಘೋಷಿಸಿದರು.
