ದೆಹಲಿ: ಗುಜರಾತ್ ನ ಅಹಮದಾಬಾದ್‌ನಲ್ಲಿ ಸಂಭವಿಸಿದ ಎಐ-171 ಏರ್ ಇಂಡಿಯಾ ವಿಮಾನ ದುರಂತದ ತನಿಖೆಗಾಗಿ ಕೇಂದ್ರ ಸರ್ಕಾರ ಉನ್ನತ ಮಟ್ಟದ ಸಮಿತಿಯನ್ನು ರಚಿಸಿದೆ. ಈ ಸಮಿತಿಯು ಭವಿಷ್ಯದ ಇಂತಹ ದುರಂತಗಳನ್ನು ತಡೆಯಲು ಪ್ರಮಾಣಿತ ನಿರ್ವಹಣಾ ಮಾರ್ಗಸೂಚಿಗಳನ್ನು (SOP) ರೂಪಿಸಲು ಮಾರ್ಗದರ್ಶನ ನೀಡಲಿದೆ.
ಕೇಂದ್ರ ಗೃಹ ಇಲಾಖೆ ಕಾರ್ಯದರ್ಶಿಯವರ ಅಧ್ಯಕ್ಷತೆಯಲ್ಲಿ ಈ ಸಮಿತಿ ರಚನೆಗೊಂಡಿದ್ದು, ನಾಗರಿಕ ವಿಮಾನಯಾನ ಹಾಗೂ ಗೃಹ ಇಲಾಖೆಗಳ ಹಿರಿಯ ಅಧಿಕಾರಿಗಳು, ಗುಜರಾತ್ ಸರ್ಕಾರದ ಪ್ರತಿನಿಧಿಗಳು, ಭಾರತೀಯ ವಾಯುಪಡೆ, ಪೊಲೀಸರು, ವಿಮಾನಯಾನ ಭದ್ರತಾ ದಳದ ತಜ್ಞರು ಸೇರಿದಂತೆ ಅನೇಕ ಇಲಾಖೆಗಳಿಂದ ಸದಸ್ಯರನ್ನು ಒಳಗೊಂಡಿದೆ.
ವಿಮಾನ ದುರಂತಕ್ಕೆ ಕಾರಣವಾದ ತಾಂತ್ರಿಕ ದೋಷ, ಮಾನವೀಯ ತಪ್ಪು, ಹವಾಮಾನ ವೈಪರಿತ್ಯ ಅಥವಾ ನಿರ್ವಹಣಾ ವೈಫಲ್ಯಗಳ ಕುರಿತು ಸಮಗ್ರ ತನಿಖೆ ನಡೆಯಲಿದೆ. ಬ್ಲ್ಯಾಕ್ ಬಾಕ್ಸ್, ಕಾಕ್‌ಪಿಟ್ ವಾಯ್ಸ್ ರೆಕಾರ್ಡ್, ಎಟಿಸಿ ದಾಖಲೆಗಳು, ಸಿಬ್ಬಂದಿಗಳ ಹೇಳಿಕೆಗಳು ಹಾಗೂ ಬೋಯಿಂಗ್ ತಯಾರಕರಿಂದ ಮಾಹಿತಿಯನ್ನು ಪಡೆದು ಸಮಿತಿ ಮೂರು ತಿಂಗಳ ಒಳಗೆ ವರದಿ ಸಲ್ಲಿಸಲಿದೆ.
ರಕ್ಷಣಾ ಕಾರ್ಯಾಚರಣೆ ತಡವಾಗಿದೆಯೇ? ಕೇಂದ್ರ–ರಾಜ್ಯಗಳ ಸಂಯೋಜನೆ ಸಮರ್ಪಕವಾಗಿತ್ತೇ? ಎಂಬುದರ ಪರಿಶೀಲನೆಯೂ ನಡೆಯಲಿದೆ. ಭಾರತದ ಪೂರಕ ವಿಮಾನ ಸುರಕ್ಷತಾ ಕ್ರಮಗಳನ್ನು ನವೀಕರಿಸುವಂತೆ ಸಮಿತಿ ಸರ್ಕಾರಕ್ಕೆ ಶಿಫಾರಸು ಮಾಡಲಿದೆ. ಅಂತಾರಾಷ್ಟ್ರೀಯ ಅಭ್ಯಾಸಗಳನ್ನು ಅಧ್ಯಯನ ಮಾಡಿ, ತರಬೇತಿ, ನಿರ್ವಹಣಾ ಸುಧಾರಣೆ, ನವೀಕೃತ ನಿಯಮಾವಳಿಗಳ ಬಗ್ಗೆ ಶಿಫಾರಸು ನೀಡಲಿದೆ.
