ನಾನು ನಿಸ್ಪಕ್ಷಪಾತವಾಗಿ ಕೆಲಸ ಮಾಡಿದ್ದೇನೆ. ಅವಿಶ್ವಾಸ ನಿರ್ಣಯ ಮಂಡಿಸಬೇಕಾದರೆ, ಅದು ಸದನಕ್ಕೆ ಬಿಟ್ಟ ವಿಚಾರ. ಸದನ ತೆಗೆದುಕೊಂಡ ನಿರ್ಧಾರವನ್ನು ನಾನು ಪಾಲಿಸಬೇಕು ಎಂದು ಬಸವರಾಜ ಹೊರಟ್ಟಿ ಹೇಳಿದರು. ವಿಧಾನ ಪರಿಷತ್ತಿಗೆ ಸಿಬ್ಬಂದಿಗಳ ನೇರ ನೇಮಕಾತಿಯಲ್ಲಿ ಅಕ್ರಮಗಳು ನಡೆದಿವೆ ಎಂಬ ಆರೋಪವನ್ನು ನಿರಾಕರಿಸಿದ ಅವರು, ಒಂದೇ ಒಂದು ರೂಪಾಯಿ ದುರುಪಯೋಗ ಸಾಬೀತಾದರೆ ಒಂದು ನಿಮಿಷವೂ ಕುರ್ಚಿಯಲ್ಲಿ ಕುಳಿತುಕೊಳ್ಳುವುದಿಲ್ಲ ಎಂದು ತಿಳಿಸಿದ್ದಾರೆ.
ಈ ಮುನ್ನ 30 ಹುದ್ದೆಗಳಿಗೆ ಪರೀಕ್ಷೆ ಮತ್ತು ಮೆರಿಟ್ ಪಟ್ಟಿಯ ಆಧಾರದ ಮೇಲೆ ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ಮೂಲಕ ನೇಮಕಾತಿ ನಡೆಸಲಾಯಿತು. ಸಮಿತಿಯೂ ಅದನ್ನು ಪರಿಶೀಲಿಸಿದೆ ಎಂದು ತಿಳಿಸಿದರು. ಈ ವೇಳೆ ವಿಧಾನ ಪರಿಷತ್ತಿನಲ್ಲಿ ಲಕ್ಷ್ಮಿ ಹೆಬ್ಬಾಳ್ಕರ್-ಸಿ ಟಿ ರವಿ ನಡುವಿನ ಜಗಳದಲ್ಲಿ ಸಚಿವೆ ಲಕ್ಷ್ಮಿ ಹೆಬ್ಬಾಳ್ಕರ್ ಅವರಿಗೆ ಸೂಕ್ತ ಗೌರವ ನೀಡಲಾಯಿತು. ಸದನವನ್ನು ಮುಂದೂಡಲಾಗಿದ್ದರೂ, ವಿಷಯವನ್ನು ನೈತಿಕ ಸಮಿತಿಗೆ ಉಲ್ಲೇಖಿಸಲಾಗಿದೆ ಎಂದು ಅವರು ಕಾಂಗ್ರೆಸ್ ಎಂಎಲ್ಸಿ ಎಂ ನಾಗರಾಜು ಅವರ ಆರೋಪಗಳಿಗೆ ಉತ್ತರಿಸುತ್ತಾ, ತಮ್ಮ ಆರೋಪಗಳಿಗೆ ಬೆಂಬಲವಾಗಿ ಪುರಾವೆ ನೀಡುವಂತೆ ಸವಾಲು ಹಾಕಿದರು.
ಮೊದಲ ಬಾರಿಗೆ ಎಂಎಲ್ಸಿಯಾಗಿರುವ ಎಂ ನಾಗರಾಜು ಅವರನ್ನು ಸವಲತ್ತು ಸಮಿತಿಯ ಮುಖ್ಯಸ್ಥರನ್ನಾಗಿ ಮಾಡಿರುವುದು ತಪ್ಪು ಎಂದು ಹೊರಟ್ಟಿ ತೀರ್ಮಾನಿಸಿದರು ಅಲ್ಲದೇ ಎಂಎಲ್ಸಿ ಅವರನ್ನು ಸರ್ಕಾರದ ವೆಚ್ಚದಲ್ಲಿ ದೆಹಲಿಗೆ ತರಬೇತಿಗಾಗಿ ಕಳುಹಿಸಿಲ್ಲ. ಅವರು ಈ ಹಿಂದೆ ಹೋಗಿದ್ದರು. ಅವರು ಆರೋಪಗಳನ್ನು ಹೊರಿಸಲು ಅದೇ ಕಾರಣವಾಗಿರಬಹುದು. ಪರಿಷತ್ತಿನ ಇತಿಹಾಸದಲ್ಲಿ ಮೊದಲ ಬಾರಿಗೆ, ಮೂವರು ಸಿಬ್ಬಂದಿ ವಿರುದ್ಧ ಅವರ ತಪ್ಪುಗಳಿಗಾಗಿ ಕ್ರಮ ಕೈಗೊಳ್ಳಲಾಗಿದ್ದು, ಇದರಿಂದ ನನ್ನ ವಿರುದ್ಧ ಆರೋಪಗಳು ಬರುತ್ತಿದೆ ಎಂದು ಹೇಳಿದ್ದಾರೆ.
ಪರಿಷತ್ತಿನ ಬಹುತೇಕ ಸದಸ್ಯರು ನನ್ನ ಪಕ್ಷಪಾತವಿಲ್ಲದ ಕಾರ್ಯ ಶೈಲಿಯಿಂದ ತೃಪ್ತರಾಗಿದ್ದಾರೆ ಎಂದು ಹೇಳಿದರು. ಇನ್ನೂ ಪ್ರಶ್ನೋತ್ತರ ಅವಧಿಯ ನಂತರ ಬೆಳಗಾವಿ ಚಳಿಗಾಲ ಅಧಿವೇಶನದಲ್ಲಿ ನಾಳೆ ಡಿಸೆಂಬರ್ 10 ಮತ್ತು ಡಿ. 17 ರಂದು ಉತ್ತರ ಕರ್ನಾಟಕದ ಸಮಸ್ಯೆಗಳ ಕುರಿತು ಚರ್ಚೆಗಾಗಿ ಪರಿಷತ್ತಿನ ಇಡೀ ದಿನವನ್ನು ಕಾಯ್ದಿರಿಸಲಾಗುವುದು ಹಾಗೂ ಈ ಪ್ರದೇಶಕ್ಕೆ ಸಂಬಂಧಿಸಿದ ವಿಷಯದ ಕುರಿತು ಚರ್ಚೆಯನ್ನು ಸೂಕ್ತ ನಿಯಮ ಅಥವಾ ಪ್ರತಿದಿನ ಗಮನ ಸೆಳೆಯುವ ನಿರ್ಣಯದ ಅಡಿಯಲ್ಲಿ ಅನುಮತಿಸಲಾಗುವುದು. ಕಾರ್ಯಸೂಚಿ ಮುಗಿಯುವವರೆಗೆ ಕಲಾಪವನ್ನು ಮುಂದೂಡಲಾಗುವುದಿಲ್ಲ ಎಂದು ತಿಳಿಸಿದರು.
