ನವದೆಹಲಿ: ಐಪಿಎಲ್ 2026ರ 38ನೇ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ಭರ್ಜರಿ ಪ್ರದರ್ಶನ ನೀಡುವ ಮೂಲಕ ಸೂಪರ್ ಓವರ್ನಲ್ಲಿ ಲಕ್ನೋ ಸೂಪರ್ ಜೈಂಟ್ಸ್ (LSG) ತಂಡವನ್ನು ಸೋಲಿಸಿದೆ. ಅಟಲ್ ಬಿಹಾರಿ ವಾಜಪೇಯಿ ಇಕಾನಾ ಕ್ರೀಡಾಂಗಣದಲ್ಲಿ ನಡೆದ ಈ ರೋಚಕ ಪಂದ್ಯದಲ್ಲಿ, ಸೂಪರ್ ಓವರ್ ನಲ್ಲಿ ಎಲ್ಎಸ್ಜಿ ನೀಡಿದ ಕೇವಲ 2 ರನ್ಗಳ ಗುರಿಯನ್ನು ಕೆಕೆಆರ್ ಪರ ರಿಂಕು ಸಿಂಗ್ ಮೊದಲ ಎಸೆತದಲ್ಲೇ ಬೌಂಡರಿ ಬಾರಿಸುವ ಮೂಲಕ ತಲುಪಿದರು.
155 ರನ್ ಗಳಿಗೆ ಟೈ ಆದ ಪಂದ್ಯ
ಮೊದಲು ಬ್ಯಾಟಿಂಗ್ ಮಾಡಿದ ಕೆಕೆಆರ್ 20 ಓವರ್ ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 155 ರನ್ ಗಳಿಸಿತು. ಇದಕ್ಕೆ ಉತ್ತರವಾಗಿ ಲಕ್ನೋ ಸೂಪರ್ ಜೈಂಟ್ಸ್ ಕೂಡ 8 ವಿಕೆಟ್ ಕಳೆದುಕೊಂಡು ನಿಖರವಾಗಿ 155 ರನ್ ಗಳಿಸಿದ್ದರಿಂದ ಪಂದ್ಯ ಟೈ ಆಗಿ ಸೂಪರ್ ಓವರ್ ಗೆ ಸಾಕ್ಷಿಯಾಯಿತು.
ಸೂಪರ್ ಓವರ್ ನಲ್ಲಿ ಏನಾಯಿತು? (12 ಎಸೆತಗಳ ರೋಚಕತೆ)
ಎಲ್ ಎಸ್ ಜಿ ಬ್ಯಾಟಿಂಗ್: ಕೆಕೆಆರ್ ಪರ ಬೌಲಿಂಗ್ ಮಾಡಿದ ಸುನಿಲ್ ನರೇನ್ ಮೊದಲ ಎಸೆತದಲ್ಲೇ ನಿಕೋಲಸ್ ಪೂರನ್ ಅವರನ್ನು ಕ್ಲೀನ್ ಬೋಲ್ಡ್ ಮಾಡಿದರು. ಎರಡನೇ ಎಸೆತದಲ್ಲಿ ರಿಷಬ್ ಪಂತ್ 1 ರನ್ ಪಡೆದರು. ಮೂರನೇ ಎಸೆತದಲ್ಲಿ ಏಡೆನ್ ಮಾರ್ಕ್ರಾಮ್ ದೊಡ್ಡ ಹೊಡೆತಕ್ಕೆ ಯತ್ನಿಸಿದರಾದರೂ, ಬೌಂಡರಿ ಲೈನ್ ನಲ್ಲಿ ರೋವ್ಮನ್ ಪವೆಲ್ ಮತ್ತು ರಿಂಕು ಸಿಂಗ್ ಅದ್ಭುತವಾಗಿ ಕ್ಯಾಚ್ ಪಡೆದರು. ಎಲ್ ಎಸ್ ಜಿ ಕೇವಲ 1 ರನ್ ಮಾತ್ರ ಗಳಿಸಲು ಶಕ್ತವಾಯಿತು.
ಕೆಕೆಆರ್ ಬ್ಯಾಟಿಂಗ್ : 2 ರನ್ ಗಳ ಸುಲಭ ಗುರಿ ಬೆನ್ನಟ್ಟಿದ ಕೆಕೆಆರ್ ಪರ ರಿಂಕು ಸಿಂಗ್ ಮೊದಲ ಎಸೆತದಲ್ಲೇ ಬೌಂಡರಿ ಸಿಡಿಸಿ ತಂಡಕ್ಕೆ ಜಯ ತಂದುಕೊಟ್ಟರು.
ಲಕ್ನೋ ಇನ್ನಿಂಗ್ಸ್ ಹೈಲೈಟ್ಸ್
ರಿಷಬ್ ಪಂತ್ 42 ರನ್ (38 ಎಸೆತ) ಮತ್ತು ಏಡೆನ್ ಮಾರ್ಕ್ರಾಮ್ 31 ರನ್ ಗಳಿಸಿ 57 ರನ್ಗಳ ಜೊತೆಯಾಟವಾಡಿದರು.
ಕೊನೆಯ ಓವರ್ ನಲ್ಲಿ ಗೆಲ್ಲಲು 17 ರನ್ ಬೇಕಿದ್ದಾಗ, ಕಾರ್ತಿಕ್ ತ್ಯಾಗಿ ಎಸೆದ ನೋ-ಬಾಲ್ ಗಳ ಲಾಭ ಪಡೆದ ಎಲ್ಎಸ್ಜಿ ಹೋರಾಟ ನಡೆಸಿತು.
ಕೊನೆಯ ಎಸೆತದಲ್ಲಿ ಮೊಹಮ್ಮದ್ ಶಮಿ ಸಿಕ್ಸರ್ ಸಿಡಿಸುವ ಮೂಲಕ ಪಂದ್ಯವನ್ನು ಟೈ ಮಾಡಿದರು. ಶಮಿ 11 ರನ್ ಗಳಿಸಿ ಅಜೇಯರಾಗುಳಿದರು.
ಕೆಕೆಆರ್ ಇನ್ನಿಂಗ್ಸ್ ಹೈಲೈಟ್ಸ್ ಹೀಗಿದೆ :
ಕೆಕೆಆರ್ ಆರಂಭಿಕ ಆಘಾತ ಅನುಭವಿಸಿತ್ತು. ರಹಾನೆ (10), ಸೀಫರ್ಟ್ (0) ಮತ್ತು ರಘುವಂಶಿ (9) ಬೇಗನೆ ಔಟಾದರು. ಕ್ಯಾಮರೂನ್ ಗ್ರೀನ್ 34 ರನ್ ಕೊಡುಗೆ ನೀಡಿದರು.
ರಿಂಕು ಸಿಂಗ್ ಸಾಹಸ : ಸಂಕಷ್ಟದಲ್ಲಿದ್ದ ತಂಡಕ್ಕೆ ಆಸರೆಯಾದ ರಿಂಕು ಸಿಂಗ್ 51 ಎಸೆತಗಳಲ್ಲಿ ಅಜೇಯ 83 ರನ್ (7 ಬೌಂಡರಿ, 5 ಸಿಕ್ಸರ್) ಸಿಡಿಸಿದರು. ಇವರು ಸುನಿಲ್ ನರೇನ್ ಅವರೊಂದಿಗೆ 8ನೇ ವಿಕೆಟ್ ಗೆ 62 ರನ್ ಗಳ ಜೊತೆಯಾಟವಾಡಿದರು.
ಬೌಲಿಂಗ್: ಎಲ್ ಎಸ್ ಜಿ ಪರ ಮೊಹ್ಸಿನ್ ಖಾನ್ 23 ರನ್ ನೀಡಿ 5 ವಿಕೆಟ್ ಪಡೆದು ಮಿಂಚಿದರು. ಕೆಕೆಆರ್ ಪರ ವರುಣ್ ಚಕ್ರವರ್ತಿ ಮತ್ತು ವೈಭವ್ ಅರೋರಾ ತಲಾ 2 ವಿಕೆಟ್ ಪಡೆದರು.
ರಿಂಕು ಸಿಂಗ್ ಅವರ ಸ್ಫೋಟಕ ಬ್ಯಾಟಿಂಗ್ ಮತ್ತು ಸುನಿಲ್ ನರೇನ್ ಅವರ ಚಾಣಾಕ್ಷ ಬೌಲಿಂಗ್ ಕೆಕೆಆರ್ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದವು (ಏಜೆನ್ಸಿಸ್)
