ಬೆಂಗಳೂರು: ಸಿಲಿಕಾನ್ ಸಿಟಿಯ ಲೈಫ್ಲೈನ್ ಎನಿಸಿಕೊಂಡಿರುವ ‘ನಮ್ಮ ಮೆಟ್ರೋ’ ಪ್ರಯಾಣಿಕರಿಗೆ ಬಿಎಂಆರ್ಸಿಎಲ್ (BMRCL) ದರ ಏರಿಕೆಯ ಬಿಸಿ ಮುಟ್ಟಿಸಿದೆ. ಕಳೆದ ವರ್ಷವಷ್ಟೇ ಭಾರಿ ಪ್ರಮಾಣದ ದರ ಹೆಚ್ಚಳ ಮಾಡಿದ್ದ ಸಂಸ್ಥೆ, ಈಗ ಮತ್ತೆ ಶೇ. 5 ರಷ್ಟು ದರ ಏರಿಸಲು ನಿರ್ಧರಿಸಿದೆ.
ಹೊಸ ದರ ಜಾರಿ ಯಾವಾಗ? ಫೆಬ್ರವರಿ 2 ರಂದು ಕರ್ನಾಟಕ ಸರ್ಕಾರವು ಬಿಎಂಆರ್ಸಿಎಲ್ ಪ್ರಸ್ತಾವನೆಗೆ ಅನುಮೋದನೆ ನೀಡಿದ್ದು, ನೂತನ ದರಗಳು ಮುಂದಿನ ಸೋಮವಾರದಿಂದ (ಫೆಬ್ರವರಿ 9) ಜಾರಿಗೆ ಬರಲಿವೆ. ದರ ನಿಗದಿ ಸಮಿತಿಯ ಶಿಫಾರಸಿನಂತೆ ಪ್ರತಿ ವರ್ಷ ಶೇ. 5 ರಷ್ಟು ದರ ಹೆಚ್ಚಳ ಮಾಡಲು ಮಂಡಳಿ ಸಭೆಯಲ್ಲಿ ತೀರ್ಮಾನಿಸಲಾಗಿದೆ.
ದರ ಪಟ್ಟಿ ಹೀಗಿರಲಿದೆ: ಈ ಏರಿಕೆಯಿಂದಾಗಿ ಕನಿಷ್ಠ ದರದಲ್ಲಿ 1 ರೂ. ಹಾಗೂ ಗರಿಷ್ಠ ದರದಲ್ಲಿ 5 ರೂ. ಹೆಚ್ಚಳವಾಗಲಿದೆ.
- ಕನಿಷ್ಠ ದರ: 10 ರೂ. ನಿಂದ 11 ರೂ. ಗೆ ಏರಿಕೆ.
- ಗರಿಷ್ಠ ದರ: 90 ರೂ. ನಿಂದ 95 ರೂ. ಗೆ ಏರಿಕೆ.
ಕಳೆದ ವರ್ಷ (2025) ಫೆಬ್ರವರಿಯಲ್ಲಿ ಶೇ. 101.5 ರಷ್ಟು ದರ ಹೆಚ್ಚಳ ಮಾಡಿದಾಗ ಸಾರ್ವಜನಿಕರಿಂದ ತೀವ್ರ ವಿರೋಧ ವ್ಯಕ್ತವಾಗಿತ್ತು. ಪ್ರಯಾಣಿಕರ ಸಂಖ್ಯೆ ಕುಸಿದ ಕಾರಣ ನಂತರ ದರವನ್ನು ಶೇ. 30 ರಷ್ಟು ಇಳಿಕೆ ಮಾಡಲಾಗಿತ್ತು. ಇದೀಗ ವಾರ್ಷಿಕ ಏರಿಕೆಯ ನೆಪದಲ್ಲಿ ಮತ್ತೆ ದರ ಕೈಗೆಟುಕದಂತಾಗುತ್ತಿರುವುದು ಸಾಮಾನ್ಯ ಪ್ರಯಾಣಿಕರ ಆತಂಕಕ್ಕೆ ಕಾರಣವಾಗಿದೆ.
