ಬೆಂಗಳೂರು: ಕಳೆದ ಕೆಲವು ದಿನಗಳಿಂದ ಸಿಲಿಕಾನ್ ಸಿಟಿಯಲ್ಲಿ “ಜೋಂಬಿ ಡ್ರಗ್ಸ್” ಕಾಲಿಟ್ಟಿದೆ ಎಂಬ ಭೀತಿ ಹುಟ್ಟಿಸಿದ್ದ ವಿಡಿಯೋದ ಅಸಲಿಯತ್ತು ಈಗ ಬಯಲಾಗಿದೆ. ರಸ್ತೆಯಲ್ಲಿ ವ್ಯಕ್ತಿಯೊಬ್ಬ ಗಂಟೆಗಟ್ಟಲೆ ನಿಂತಲ್ಲೇ ನಿಂತಿದ್ದ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ಎಚ್ಚೆತ್ತ ಈಶಾನ್ಯ ವಿಭಾಗದ ಪೊಲೀಸರು ನಡೆಸಿದ ತನಿಖೆಯಲ್ಲಿ ಇದು ಯಾವುದೇ ಡ್ರಗ್ಸ್ ಪ್ರಭಾವವಲ್ಲ ಎಂಬ ಸ್ಫೋಟಕ ಸತ್ಯ ಹೊರಬಿದ್ದಿದೆ.
ಯಾರು ಆ ವ್ಯಕ್ತಿ? ಅಂದು ನಡೆದಿದ್ದೇನು?
ವೈರಲ್ ವಿಡಿಯೋದಲ್ಲಿದ್ದ ವ್ಯಕ್ತಿ ಪಂಜಾಬ್ ಮೂಲದ ಲಾರಿ ಚಾಲಕ ರಾಜವೀರ್ ಸಿಂಗ್. ಈ ಹಿಂದೆ ಅಫೀಮು ವ್ಯಸನಿಯಾಗಿದ್ದ ಈತನನ್ನು ಕುಟುಂಬದವರು ಡಿ-ಅಡಿಕ್ಷನ್ ಸೆಂಟರ್ಗೆ ಸೇರಿಸಿ ಚಿಕಿತ್ಸೆ ಕೊಡಿಸಿದ್ದರು. ಚೇತರಿಸಿಕೊಂಡ ಬಳಿಕ ಬೆಂಗಳೂರಿಗೆ ಬಂದು ಲಾರಿ ಚಾಲಕನಾಗಿ ಕೆಲಸ ಮಾಡುತ್ತಿದ್ದ ರಾಜವೀರ್, ನಗರದ ಶೆಡ್ ಒಂದರಲ್ಲಿ ಉಳಿದುಕೊಂಡಿದ್ದ.
ಘಟನೆಗೆ ಕಾರಣವಾದ ಕೆಮಿಕಲ್ ರಿಯಾಕ್ಷನ್ :
ರಾಜವೀರ್ ಸಿಂಗ್ ತೀವ್ರವಾದ ಸಂಧಿವಾತ ಮತ್ತು ಸೈನಸೈಟಿಸ್ ಕಾಯಿಲೆಯಿಂದ ಬಳಲುತ್ತಿದ್ದಾನೆ. ಘಟನೆಯ ದಿನ ಲಾರಿ ಚಾಲಕರೊಂದಿಗೆ ಸೇರಿ ಅತಿಯಾಗಿ ಮದ್ಯ ಸೇವನೆ ಮಾಡಿದ್ದ ರಾಜವೀರ್, ನಂತರ ತನ್ನ ಕಾಯಿಲೆಗೆ ಸಂಬಂಧಿಸಿದ ಎರಡು ಮಾತ್ರೆಗಳನ್ನು ತೆಗೆದುಕೊಂಡಿದ್ದ.
ಮದ್ಯ ಮತ್ತು ಮಾತ್ರೆಗಳ ಮಿಶ್ರಣದಿಂದ ದೇಹದಲ್ಲಿ ತೀವ್ರವಾದ ಕೆಮಿಕಲ್ ರಿಯಾಕ್ಷನ್ ಉಂಟಾಗಿ, ಆತನ ಕಣ್ಣು ಮಂಜಾಗಿತ್ತು ಮತ್ತು ಕೈಕಾಲುಗಳು ಸ್ವಾಧೀನ ಕಳೆದುಕೊಂಡಿದ್ದವು. ನಡೆಯಲು ಅಸಾಧ್ಯವಾದ ಕಾರಣ ಆತ ಒಂದೇ ಕಡೆ ಸ್ಥಗಿತಗೊಂಡು ನಿಂತಿದ್ದ. ಇದನ್ನೇ ನೋಡಿದ ಕೆಲವರು “ಜೋಂಬಿ ಡ್ರಗ್ಸ್” ಎಂದು ತಪ್ಪಾಗಿ ಭಾವಿಸಿ ವಿಡಿಯೋ ಮಾಡಿ ಹರಿಬಿಟ್ಟಿದ್ದರು.
ಸುಳ್ಳು ಸುದ್ದಿ ಹಬ್ಬಿಸುವವರ ವಿರುದ್ಧ ಕಠಿಣ ಕ್ರಮ : ಸೀಮಂತ್ ಕುಮಾರ್ ಸಿಂಗ್ ಎಚ್ಚರಿಕೆ
ಈ ಕುರಿತು ನಗರ ಪೊಲೀಸ್ ಆಯುಕ್ತ ಸೀಮಂತ್ ಕುಮಾರ್ ಸಿಂಗ್ ಅವರು ಕಡಕ್ ಎಚ್ಚರಿಕೆ ನೀಡಿದ್ದಾರೆ. “ವಿಡಿಯೋದಲ್ಲಿದ್ದ ವ್ಯಕ್ತಿಗೆ ವೈದ್ಯಕೀಯ ಚಿಕಿತ್ಸೆ ನೀಡಲಾಗಿದ್ದು, ಯಾವುದೇ ನಿಷೇಧಿತ ಡ್ರಗ್ಸ್ ಪತ್ತೆಯಾಗಿಲ್ಲ. ಕೇವಲ ಮದ್ಯ ಮತ್ತು ಔಷಧಿಯ ಪ್ರಭಾವದಿಂದ ಆ ಸ್ಥಿತಿ ನಿರ್ಮಾಣವಾಗಿತ್ತು,” ಎಂದು ಸ್ಪಷ್ಟಪಡಿಸಿದ್ದಾರೆ.
ಪೊಲೀಸ್ ಆಯುಕ್ತರ ಪ್ರಮುಖ ಸೂಚನೆಗಳು ಹೀಗಿದೆ :
ಅಪಪ್ರಚಾರ ಬೇಡ: ಇಂತಹ ವಿಡಿಯೋಗಳನ್ನು ವೈರಲ್ ಮಾಡುವ ಮೂಲಕ ನಗರದ ಘನತೆಗೆ ಧಕ್ಕೆ ತರಬೇಡಿ.
ಪೊಲೀಸರಿಗೆ ಮಾಹಿತಿ ನೀಡಿ : ಯಾವುದಾದರೂ ಸಂಶಯಾಸ್ಪದ ಘಟನೆ ಕಂಡರೆ ಮೊದಲು ಪೊಲೀಸರಿಗೆ ತಿಳಿಸಿ, ಸಾಮಾಜಿಕ ಜಾಲತಾಣದಲ್ಲಿ ಸುಳ್ಳು ಸುದ್ದಿ ಹಬ್ಬಿಸಬೇಡಿ.
ಕಾನೂನು ಕ್ರಮ : ಸುಳ್ಳು ವಿಡಿಯೋ ತಯಾರಿಸಿದವರು ಮಾತ್ರವಲ್ಲದೆ, ಅದನ್ನು ಶೇರ್ ಮಾಡಿದವರಿಗೂ ನೋಟಿಸ್ ಜಾರಿ ಮಾಡಿ ಕಾನೂನು ಕ್ರಮ ಕೈಗೊಳ್ಳಲಾಗುವುದು.
ನಗರದಲ್ಲಿ ಡ್ರಗ್ಸ್ ವಿಚಾರವಾಗಿ ಪೊಲೀಸರು ‘ಝೀರೋ ಟಾಲರೆನ್ಸ್’ ನೀತಿ ಅನುಸರಿಸುತ್ತಿದ್ದು, ಸಾರ್ವಜನಿಕರು ಯಾವುದೇ ಆತಂಕ ಪಡುವ ಅಗತ್ಯವಿಲ್ಲ ಎಂದು ಇಲಾಖೆ ಭರವಸೆ ನೀಡಿದೆ.
ನೆನಪಿಡಿ : ಸೋಶಿಯಲ್ ಮೀಡಿಯಾದಲ್ಲಿ ಬರುವ ಪ್ರತಿಯೊಂದು ವಿಡಿಯೋವನ್ನು ಕಣ್ಣು ಮುಚ್ಚಿ ನಂಬಬೇಡಿ. ವಾಸ್ತವ ತಿಳಿಯದೆ ಶೇರ್ ಮಾಡುವುದು ನಿಮ್ಮನ್ನೂ ಕಾನೂನು ಸಂಕಷ್ಟಕ್ಕೆ ಸಿಲುಕಿಸಬಹುದು.
