ನವದೆಹಲಿ : 2026ರ ಮಹಿಳಾ ಟಿ20 ವಿಶ್ವಕಪ್ ಗಾಗಿ ಆಸ್ಟ್ರೇಲಿಯಾ ತಂಡವನ್ನು ಘೋಷಿಸಲಾಗಿದ್ದು, 15 ಸದಸ್ಯರ ಬಲಿಷ್ಠ ಪಡೆಯನ್ನು ಆಯ್ಕೆ ಮಾಡಲಾಗಿದೆ. ಈ ತಂಡದ ನೇತೃತ್ವವನ್ನು ಸೋಫಿ ಮೊಲಿನಕ್ಸ್ ವಹಿಸಲಿದ್ದಾರೆ.
ಅನುಭವಿ ಎಡಗೈ ವೇಗದ ಬೌಲರ್ ಲೂಸಿ ಹ್ಯಾಮಿಲ್ಟನ್ ಅವರಿಗೆ ತಂಡದಲ್ಲಿ ಸ್ಥಾನ ನೀಡಲಾಗಿದ್ದು, ಡಾರ್ಸಿ ಬ್ರೌನ್ ಅವರನ್ನು ತಂಡದಿಂದ ಕೈಬಿಡಲಾಗಿದೆ. ಹ್ಯಾಮಿಲ್ಟನ್ ಕಳೆದ ವರ್ಷ ಐಸಿಸಿ ಅಂಡರ್-19 ಮಹಿಳಾ ಟಿ20 ವಿಶ್ವಕಪ್ನಲ್ಲಿ ಆಸ್ಟ್ರೇಲಿಯಾವನ್ನು ಮುನ್ನಡೆಸಿದ್ದರು.
ತಂಡದಲ್ಲಿ ಆಶ್ಲೇ ಗಾರ್ಡ್ನರ್, ತಾಹ್ಲಿಯಾ ಮೆಕ್ಗ್ರಾತ್, ಎಲಿಸ್ ಪೆರ್ರಿ ಮತ್ತು ಬೆತ್ ಮೂನಿ ಅವರಂತಹ ದಿಗ್ಗಜ ಆಟಗಾರ್ತಿಯರಿದ್ದಾರೆ. 2009ರಿಂದ ನಿರಂತರವಾಗಿ ಟಿ20 ವಿಶ್ವಕಪ್ ಆಡುತ್ತಿರುವ ಎಲಿಸ್ ಪೆರ್ರಿ, ಈ ಬಾರಿ ವಿಶ್ವಕಪ್ನಲ್ಲಿ ತಮ್ಮ 50ನೇ ಪಂದ್ಯ ಪೂರೈಸಲಿದ್ದಾರೆ.
ಮಾರ್ಚ್ನಲ್ಲಿ ನಡೆದ ಕೆರಿಬಿಯನ್ ಪ್ರವಾಸದಿಂದ ಹೊರಗುಳಿದಿದ್ದ ಗ್ರೇಸ್ ಹ್ಯಾರಿಸ್ ಮತ್ತು ಅನ್ನಾಬೆಲ್ ಸದರ್ಲ್ಯಾಂಡ್ ತಂಡಕ್ಕೆ ಮರಳಿದ್ದಾರೆ. ಮೂರು ವರ್ಷಗಳ ನಂತರ ರಾಷ್ಟ್ರೀಯ ತಂಡಕ್ಕೆ ಮರಳಿರುವ ನಿಕೋಲಾ ಕ್ಯಾರಿ, 2020ರ ನಂತರ ಮೊದಲ ಬಾರಿಗೆ ವಿಶ್ವಕಪ್ ಆಡಲಿದ್ದಾರೆ.
ವಿಕೆಟ್ ಕೀಪರ್ ಬ್ಯಾಟರ್ ತಾಹ್ಲಿಯಾ ವಿಲ್ಸನ್ ಅವರನ್ನು ಟ್ರಾವೆಲಿಂಗ್ ರಿಸರ್ವ್ ಆಗಿ ಸೇರಿಸಿಕೊಳ್ಳಲಾಗಿದೆ.
ಆಸ್ಟ್ರೇಲಿಯಾ ತಂಡವು ಒಟ್ಟು 7 ಬೌಲಿಂಗ್ ಆಯ್ಕೆಗಳನ್ನು ಹೊಂದಿದೆ:
ಮೇಗನ್ ಶಟ್, ಕಿಮ್ ಗಾರ್ತ್, ಅನ್ನಾಬೆಲ್ ಸದರ್ಲ್ಯಾಂಡ್, ತಾಹ್ಲಿಯಾ ಮೆಕ್ಗ್ರಾತ್,ಎಲಿಸ್ ಪೆರ್ರಿ, ನಿಕೋಲಾ ಕ್ಯಾರಿ, ಲೂಸಿ ಹ್ಯಾಮಿಲ್ಟನ್ ತಂಡದಲ್ಲಿದ್ದಾರೆ
ಗುಂಪು ಮತ್ತು ಮೊದಲ ಪಂದ್ಯ:
ಟಿ20 ವಿಶ್ವಕಪ್ ನ ಗ್ರೂಪ್ 1 ರಲ್ಲಿ ಆಸ್ಟ್ರೇಲಿಯಾ ಸ್ಥಾನ ಪಡೆದಿದ್ದು, ದಕ್ಷಿಣ ಆಫ್ರಿಕಾ, ಭಾರತ, ಪಾಕಿಸ್ತಾನ, ಬಾಂಗ್ಲಾದೇಶ ಮತ್ತು ನೆದರ್ಲ್ಯಾಂಡ್ಸ್ ತಂಡಗಳೊಂದಿಗೆ ಸೆಣಸಲಿದೆ. ಆಸ್ಟ್ರೇಲಿಯಾ ತನ್ನ ಮೊದಲ ಪಂದ್ಯವನ್ನು ಜೂನ್ 13 ರಂದು ಮ್ಯಾಂಚೆಸ್ಟರ್ನ ಓಲ್ಡ್ ಟ್ರಾಫರ್ಡ್ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಆಡಲಿದೆ.
ಆಸ್ಟ್ರೇಲಿಯಾ ತಂಡದ ಪೂರ್ಣ ಪಟ್ಟಿ:
ಸೋಫಿ ಮೊಲಿನಕ್ಸ್ (ನಾಯಕಿ), ನಿಕೋಲಾ ಕ್ಯಾರಿ, ಆಶ್ಲೇ ಗಾರ್ಡ್ನರ್, ಕಿಮ್ ಗಾರ್ತ್, ಲೂಸಿ ಹ್ಯಾಮಿಲ್ಟನ್, ಗ್ರೇಸ್ ಹ್ಯಾರಿಸ್, ಅಲಾನಾ ಕಿಂಗ್, ಫೋಬೆ ಲಿಚ್ಫೀಲ್ಡ್, ತಾಹ್ಲಿಯಾ ಮೆಕ್ಗ್ರಾತ್, ಬೆತ್ ಮೂನಿ, ಎಲಿಸ್ ಪೆರ್ರಿ, ಮೇಗನ್ ಶಟ್, ಅನ್ನಾಬೆಲ್ ಸದರ್ಲ್ಯಾಂಡ್, ಜಾರ್ಜಿಯಾ ವೋಲ್, ಜಾರ್ಜಿಯಾ ವೇರ್ಹ್ಯಾಮ್. (ಏಜೆನ್ಸಿಸ್)
