ಬೆಂಗಳೂರು: ಬೆಂಗಳೂರು ಸಮೀಪದ ಬನ್ನೇರುಘಟ್ಟ ಜೈವಿಕ ಉದ್ಯಾನವನದಲ್ಲಿ ಮುಂದಿನ ತಿಂಗಳುಗಳಿಂದ ಬಹುಮುಖ್ಯ ಬದಲಾವಣೆಗಳು ನಡೆಯಲಿದ್ದು, ಚಿಂಪಾಜಿ, ಬೇಟೆ ಚೀತಾ, ಜಾಗ್ವಾರ್, ಪೂಮಾ, ಕ್ಯಾಪಚಿನ್ ಕೋತಿ ಸೇರಿದಂತೆ 10 ವಿದೇಶಿ ವನ್ಯಜೀವಿಗಳನ್ನು ಸೇರ್ಪಡೆಗೊಳಿಸಲಾಗುವುದು ಎಂದು ಅರಣ್ಯ, ಜೀವಿಶಾಸ್ತ್ರ ಮತ್ತು ಪರಿಸರ ಸಚಿವ ಈಶ್ವರ ಬಿ ಖಂಡ್ರೆ ತಿಳಿಸಿದ್ದಾರೆ.
ವಿಕಾಸಸೌಧದಿಂದ ದೇಶದ ಮೊದಲ ವಿದ್ಯುತ್ ಚಾಲಿತ ಸಫಾರಿ ಬಸ್ಸಿಗೆ ವರ್ಚುವಲ್ ಮೂಲಕ ಚಾಲನೆ ನೀಡಿದ ಅವರು ಮಾತನಾಡುತ್ತಾ, “ಹುಲಿ, ಸಿಂಹ, ಚಿರತೆ, ಕರಡಿಗಳ ಸಫಾರಿಗೆ ಈಗ ಡೀಸೆಲ್ ವಾಹನಗಳನ್ನು ಬಳಸಲಾಗುತ್ತಿದೆ. ಪರಿಸರದ ಸಂರಕ್ಷಣೆಗೆ ನಾವಿಲ್ಲಿ ವಿದ್ಯುತ್ ಚಾಲಿತ ಬಸ್ ಪರಿಚಯಿಸುತ್ತಿದ್ದೇವೆ. ಇದು 100 ಕೆ.ವಿ. ಸಾಮರ್ಥ್ಯದ ಬ್ಯಾಟರಿಯೊಂದಿಗೆ 2 ಗಂಟೆ ಚಾರ್ಜ್‌ನಲ್ಲಿ 160 ಕಿ.ಮೀ. ಸಂಚರಿಸಬಹುದು. ಪ್ರಸ್ತುತ ಒಂದೇ ಬಸ್ಸು ಪ್ರಯೋಗಾತ್ಮಕವಾಗಿ ಕಾರ್ಯನಿರ್ವಹಿಸಲಿದ್ದು, 2027ರೊಳಗೆ ಇಂಧನ ರಹಿತ ವಲಯವಾಗಿ ಬನ್ನೇರುಘಟ್ಟ ಉದ್ಯಾನವನ್ನು ಪರಿವರ್ತನೆಗೊಳಿಸಲಾಗುತ್ತದೆ” ಎಂದರು.
ಸಾರಿಗೆ ಅಭಿವೃದ್ಧಿಯ ಜೊತೆಗೆ, ಜೈವಿಕ ಉದ್ಯಾನದಲ್ಲಿ ಬೃಹತ್ ಮತ್ಸ್ಯಾಗಾರ ನಿರ್ಮಾಣದ ಯೋಜನೆಯೂ ಸಜ್ಜಾಗಿದೆ. 7 ಕೆರೆಗಳು ಹಾಗೂ ನಗರ ನೀರು ಸರಬರಾಜು ವ್ಯವಸ್ಥೆ ಇದನ್ನು ಬೆಂಬಲಿಸಲಿದೆ. ಚಿರತೆ ಸಫಾರಿ ಈಗಾಗಲೇ ಪ್ರವಾಸಿಗರ ಅತಿದೊಡ್ಡ ಆಕರ್ಷಣೆಯಾಗಿದ್ದು, 2025ರ ಮೇ ತಿಂಗಳಲ್ಲಿ 2.85 ಲಕ್ಷ ಮಂದಿ ಬನ್ನೇರುಘಟ್ಟಕ್ಕೆ ಭೇಟಿ ನೀಡಿದ್ದು ದಾಖಲೆ ಸಂಖ್ಯೆ ಎನ್ನಬಹುದು.
ಇತ್ತೀಚೆಗಿನ ಜೀಬ್ರಾ ಮತ್ತು ನೀಲಗಾಯ್ ಸಾವಿನ ಕುರಿತಂತೆ ಸಚಿವರು ತನಿಖೆ ಆರಂಭಿಸಲು ಆದೇಶಿಸಿದ್ದಾರೆ. ಈ ಬಗ್ಗೆ ವರದಿ ಬಂದ ಬಳಿಕ ಕ್ರಮ ಕೈಗೊಳ್ಳಲಾಗುವುದು ಎಂದರು. ಜೊತೆಗೆ, ಗುಲ್ಬರ್ಗಾದಲ್ಲಿ ಹೊಸ ಮೃಗಾಲಯ ನಿರ್ಮಾಣ ಕಾರ್ಯ ಡಿಸೆಂಬರ್ 2025ರೊಳಗೆ ಪೂರ್ಣಗೊಳ್ಳಲಿದೆ ಎಂದು ಮಾಹಿತಿ ನೀಡಿದರು.
