ಗೋವಾ: ಗೋವಾದಲ್ಲಿ ಆಯೋಜಿಸಿದ 2025 ರ 56ನೇ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ ಸಮಾರೋಪ ಸಮಾರಂಭದಲ್ಲಿ ರಜನಿಕಾಂತ್ ಅವರಿಗೆ ಪ್ರತಿಷ್ಠಿತ ಜೀವಮಾನ ಸಾಧನೆ ಪ್ರಶಸ್ತಿಯನ್ನು ನೀಡಿ ಗೌರವಿಸಿದೆ. ಇದು ರಜನಿಕಾಂತ್ ಅವರ ಚಲನಚಿತ್ರೋದ್ಯಮದ 50 ವರ್ಷಗಳ ಗಮನಾರ್ಹ ಮೈಲಿಗಲ್ಲಿಗೆ ಸಿಕ್ಕ ಅಭೂತಪೂರ್ವ ಪ್ರಶಸ್ತಿಯಾಗಿದೆ ಹಾಗೂ ಅವರ 50 ವರ್ಷದ ಸಿನಿ ಜರ್ನಿಯನ್ನು ಮೆಲಕು ಹಾಕಿದಂತಿದೆ.
ಈ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು ತಮ್ಮ ಐದು ದಶಕಗಳ ಸಿನಿ ಪಯಣ ಅಥವಾ ವೃತ್ತಿಜೀವನವು ನಾನು ಅಂದುಕೊಂಡಿದ್ದಕ್ಕಿಂತ ತುಂಬಾ ಚಿಕ್ಕದಾಗಿದೆ ಎಂದು ತಿಳಿಸಿದರು.
ಇನ್ನೂ 1975ರಲ್ಲಿ ಕೆ. ಬಾಲಚಂದರ್ ಅವರ ‘ಅಪೂರ್ವ ರಾಗಂಗಳ್’ ಚಿತ್ರದ ಮೂಲಕ ಸಿನಿ ಜಗತ್ತಿಗೆ ಕಾಲಿಟ್ಟ ಶಿವಾಜಿ ರಾವ್ ಗಾಯಕ್ವಾಡ್ ಆಗಿದ್ದ ಇವರು, ನಂತರ ಸೂಪರ್ ಸ್ಟಾರ್ ರಜನಿಕಾಂತ್ ಆಗಿ ಐದು ದಶಕಗಳಿಂದ ಚಿತ್ರರಂಗವನ್ನು ಆಳುತ್ತಿದ್ದು, ಈ ಬಗ್ಗೆ ತಮಿಳು ಜನರಿಗೆ ಧನ್ಯವಾದ ತಿಳಿಸಿದ ಸೂಪರ್‌ಸ್ಟಾರ್ ರಜನಿಕಾಂತ್ ಅವರ ಭಾಷಣದ ವಿಡಿಯೋ ಎಲ್ಲೆಡೆ ವೈರಲ್‌ ಆಗುತ್ತಿದೆ.
ಅದರಲ್ಲಿ ರಜನಿಕಾಂತ್ ತಮ್ಮ ಅಗಾಧ ಕೃತಜ್ಞತೆಯನ್ನು ವ್ಯಕ್ತಪಡಿಸುತ್ತಾ, ನನ್ನ ಐವತ್ತು ವರ್ಷಗಳ ಸಿನಿಮಾ ನಟನೆಯು 10 ಅಥವಾ 15 ವರ್ಷಗಳಂತೆ ಭಾಸವಾಯಿತು. ಇನ್ನೂ 100 ಜನ್ಮಗಳು ಅಂತ ಇದ್ದರೆ, ನಾನು ನಟನಾಗಿ ಮತ್ತೇ ರಜನಿಕಾಂತ್ ಆಗಿ ಹುಟ್ಟಲು ಬಯಸುತ್ತೇನೆ. ಈ ಎಲ್ಲಾ ಗೌರವವು ಸಿನಿಮಾ ಉದ್ಯಮಕ್ಕೆ ಮತ್ತು ಮುಖ್ಯವಾಗಿ ನನ್ನನ್ನು ಜೀವಂತವಾಗಿಡುವ ದೇವರುಗಳಾದ ತಮಿಳು ಜನರಿಗೆ ಸಲ್ಲುತ್ತದೆ” ಎಂದು ತಿಳಿಸಿದ್ದಾರೆ.
IFFI 2025 ಬಗ್ಗೆ ನೋಡುವುದಾದರೆ, ನವೆಂಬರ್ 28 ರಂದು ಮುಕ್ತಾಯಗೊಂಡ ಈ ಉತ್ಸವವು ಪ್ರಪಂಚದಾದ್ಯಂತದ ಚಲನಚಿತ್ರ ನಿರ್ಮಾಪಕರು ಮತ್ತು ಕಲಾವಿದರನ್ನು ಒಟ್ಟುಗೂಡಿಸಿ, ಹಲವಾರು ಸಿನಿಮಾ ದಂತಕಥೆಗಳಿಗೆ ಗೌರವ ಸಲ್ಲಿಸಿದೆ. ಗುರುದತ್, ರಾಜ್ ಖೋಸ್ಲಾ, ಋತ್ವಿಕ್ ಘಟಕ್, ಪಿ. ಭಾನುಮತಿ, ಭೂಪೇನ್ ಹಜಾರಿಕಾ ಮತ್ತು ಸಲೀಲ್ ಚೌಧರಿಯಂತಹ ಶ್ರೇಷ್ಠ ವ್ಯಕ್ತಿಗಳ ಶತಮಾನೋತ್ಸವಗಳನ್ನು IFFI ಅವರ ಶ್ರೇಷ್ಠ ಕೃತಿಗಳ ಆವೃತ್ತಿಗಳನ್ನು ಪ್ರದರ್ಶಿಸುವ ಮೂಲಕ ಸ್ಮರಿಸಿತು.
56ನೇ IFFI ಆವೃತ್ತಿ ಜಗತ್ತಿನ ಅತ್ಯುತ್ತಮ ಚಿತ್ರಗಳನ್ನು ಒಟ್ಟುಗೂಡಿಸುವ ಮಹೋತ್ಸವವಾಗಿದ್ದು, ಇಂಡಿಯನ್ ಪನೋರಮಾ ವಿಭಾಗವು ಸಮಕಾಲೀನ ಭಾರತೀಯ ಚಿತ್ರರಂಗದ ಅತ್ಯುತ್ತಮ ಚಿತ್ರಗಳನ್ನು ಆಯ್ಕೆ ಮಾಡಿರುವ ಪ್ರದರ್ಶಿಸುವ ವೇದಿಕೆಯಾಗಿದೆ ಎನ್ನಲಾಗಿದೆ.
