ವಾಷಿಂಗ್ಟನ್‌ : ಅಫ್ಘಾನಿಸ್ತಾದ ಪ್ರಜೆಯೊಬ್ಬ ಅಮೆರಿಕಾದ ವಾಷಿಂಗ್ಟನ್‌ ಡಿಸಿಯಲ್ಲಿರುವ ಶ್ವೇತಭವನದಲ್ಲಿ ಇಬ್ಬರು ರಾಷ್ಟ್ರೀಯ ರಕ್ಷಣಾ ಪಡೆ ಯೋಧರ ಮೇಲೆ ಗುಂಡು ಹಾರಿಸಿದ ಘಟನೆಯಲ್ಲಿ ಒಬ್ಬರು ಸಾವನ್ನಪ್ಪಿದ ಬೆನ್ನಲ್ಲೇ ಎಚ್ಚೆತ್ತ ಅಮೆರಿಕಾ ಆಡಳಿತ, ಅಫ್ಘಾನ್ ಪಾಸ್‌ಪೋರ್ಟ್‌ಗಳನ್ನು ಹೊಂದಿರುವ ಜನರಿಗೆ ವೀಸಾ ನೀಡುವುದನ್ನು ನಿರ್ಬಂಧಿಸುವಂತೆ ಆದೇಶ ಹೊರಡಿಸಿದೆ.
ಈ ಕುರಿತು ತಮ್ಮ ಅಧಿಕೃತ ಎಕ್ಸ್‌ ಖಾತೆಯಲ್ಲಿ ಮಾಹಿತಿ ಹಂಚಿಕೊಂಡಿರುವ ವಿದೇಶಾಂಗ ಇಲಾಖೆ ಕಾರ್ಯದರ್ಶಿ ಮಾರ್ಕೊ ರುಬಿಯೊ, “ಅಫ್ಘಾನ್ ಪಾಸ್‌ಪೋರ್ಟ್‌ಗಳಲ್ಲಿ ಪ್ರಯಾಣಿಸುವ ವ್ಯಕ್ತಿಗಳಿಗೆ ವೀಸಾ ನೀಡುವಿಕೆಯನ್ನು ವಿದೇಶಾಂಗ ಇಲಾಖೆ ತಕ್ಷಣವೇ ಸ್ಥಗಿತಗೊಳಿಸಿದ್ದು, ಅಮೆರಿಕದ ರಾಷ್ಟ್ರೀಯ ಭದ್ರತೆ ಮತ್ತು ಸಾರ್ವಜನಿಕ ಸುರಕ್ಷತೆಯನ್ನು ರಕ್ಷಿಸಲು ಇಲಾಖೆ ಎಲ್ಲಾ ಅಗತ್ಯ ಕ್ರಮಗಳನ್ನು ತೆಗೆದುಕೊಳ್ಳುತ್ತಿದೆ” ಎಂದು ತಿಳಿಸಿದ್ದಾರೆ.
ಅಧಿಕಾರಕ್ಕೆ ಬಂದಾಗಿನಿಂದಲೂ ವಲಸೆ ವಿರುದ್ದ ಕಠಿಣ ನೀತಿಯನ್ನು ಅನುಸರಿಸುತ್ತಿರುವ ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಇದೀಗ ಅಫ್ಘಾನ್ ಪ್ರಜೆಗಳ ಮೇಲೆ ತನ್ನ ಕೆಂಗಣ್ಣು ಹರಿಸಿದ್ದು, ಅವರಿಗೆ ವೀಸಾ ನೀಡುವ ಪ್ರಕ್ರಿಯೆಯನ್ನೇ ತಡೆಹಿಡಿದ್ದಿದ್ದಾರೆ ಎನ್ನಲಾಗಿದೆ. ಘಟನೆ ಬಳಿಕ ಟ್ರಂಪ್‌ “ಮೂರನೇ ಜಗತ್ತಿನ ದೇಶಗಳಿಂದ ವಲಸೆಯನ್ನು ಶಾಶ್ವತವಾಗಿ ವಿರಾಮಗೊಳಿಸುತ್ತೇನೆ” ಎಂದು ಹೇಳಿ ರಿವರ್ಸ್‌ ವಲಸೆ ನೀತಿಗೆ ಕರೆ ನೀಡಿದ್ದಾರೆ.
ಅದಲ್ಲದೇ, ದಾಳಿ ಬಳಿಕ ಅಫ್ಘಾನಿಸ್ತಾನ ಸೇರಿದಂತೆ 19 ಈ ದೇಶಗಳನ್ನು ಆತಂಕಕಾರಿ ವಲಸಿಗರಿರುವ ದೇಶಗಳೆಂದು ಗುರುತಿಸಿ, ಆ ದೇಶಗಳ ವಲಸಿಗರ ಗ್ರೀನ್‌ ಕಾರ್ಡ್‌ ಅರ್ಜಿಗಳನ್ನು ಕೂಲಂಕಷವಾಗಿ ಪರಿಶೀಲಿಸಿ ಅವರ ಮೇಲೆ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಆದೇಶ ಹೊರಡಿಸಿದ್ದಾರೆ.
ಇನ್ನು, ಅಮೆರಿಕಾ ಅಧ್ಯಕ್ಷರ ಈ ಆದೇಶಗಳು ಹೊರ ಬೀಳುತ್ತಿದ್ದಂತೆ ವಿಶ್ವಸಂಸ್ಥೆಯ ಸಂಸ್ಥೆಯು ಈ ರೀತಿ ವಲಸಿಗರನ್ನು ಗುರಿಯಾಗಿಸಬೇಡಿ. ನಿಮ್ಮ ಅಮೆರಿಕಾಗೆ ವಲಸೆ ಬರಲು ಬಯಸುವ ಥರ್ಡ್‌ ವಲ್ಡ್‌ ದೇಶಗಳ ವಲಸಿಗರಿಗೆ ಸೂಕ್ತ ಮಾರ್ಗ ಹಾಗೂ ಪ್ರಕ್ರಿಯೆಗಳನ್ನು ನೀಡಿ ಅವರಿಗೆ ಮತ್ತೊಂದು ಅವಕಾಶ ಒದಗಿಸಿ ಎಂದು ಮನವಿ ಮಾಡಿಕೊಂಡಿದ್ದಾರೆ.
ಈ ಕುರಿತು ಮಾಧ್ಯಮಗಳೊಂದಿಗೆ ಮಾತನಾಡಿದ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಕಚೇರಿಯ ವಕ್ತಾರ ಜೆರೆಮಿ ಲಾರೆನ್ಸ್, ಅಮೆರಿಕಾಗೆ ವಲಸೆ ಹೋಗುವವರು ಅಂತರರಾಷ್ಟ್ರೀಯ ಕಾನೂನಿನಡಿಯಲ್ಲಿ ರಕ್ಷಣೆಗೆ ಅರ್ಹರಾಗಿದ್ದಾರೆ. ಬಹುಪಾಲು ವಲಸಿಗರು ತಾವು ವಲಸೆ ಹೋದ ಪ್ರದೇಶದಲ್ಲಿನ ಸಮುದಾಯದ ಕಾನೂನು ಪಾಲಿಸುವರೇ ಆಗಿದ್ದಾರೆ ಎಂದು ತಿಳಿಸಿದ್ದಾರೆ. ಹಾಗೂ ವಲಸಿಗರ ವಿರುದ್ದ ದಿನಕ್ಕೊಂದು ಕಠಿಣ ನೀತಿಗಳನ್ನು ತರುತ್ತಾ, ವಲಸಿಗರ ಮೇಲೆ H-1B ವೀಸಾ, ಗ್ರೀನ್‌ ಕಾರ್ಡ್‌, ಸಾಮಾನ್ಯ ವೀಸಾ ಸೇರಿದಂತೆ ಹಲವು ವಿಷಯಗಳಲ್ಲಿ ಯಾರೂ ಕಂಡು ಕೇಳರಿಯದ ವಿಭಿನ್ನ ನಿರ್ಬಂಧಗಳನ್ನು ತರುವ ಮೂಲಕ ಅಮೆರಿಕಾಗೆ ಹೋಗಲು ಬಯಸುವವರ ದುಸ್ವಪ್ನವಾಗಿರುವ ಟ್ರಂಪ್‌ ಮುಂದಿನ ದಿನಗಳಲ್ಲಿ ಇನ್ನೂ, ಯಾವ ರೀತಿಯ ನಿಯಮಗಳನ್ನು ಹೇರಲಿದ್ದಾರೆ ಎಂಬುದು ಕುತೂಹಲಕಾರಿಯಾಗಿದೆ ಎಂದು ಅಭಿಪ್ರಾಯ ತಿಳಿಸಿದ್ದಾರೆ.
