ನವದೆಹಲಿ : ನಾರ್ವೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಪ್ರಶ್ನಿಸಿದ್ದ ಪತ್ರಕರ್ತೆ ಹೆಲ್ಲೆ ಲಿಂಗ್ (Helle Lyng), ತಮ್ಮ ಇನ್ಸ್ಟಾಗ್ರಾಮ್ ಮತ್ತು ಫೇಸ್ಬುಕ್ ಖಾತೆಗಳನ್ನು ಸಸ್ಪೆಂಡ್ (ಅಮಾನತು) ಮಾಡಲಾಗಿದೆ ಎಂದು ಪ್ರತಿಪಾದಿಸಿದ್ದಾರೆ. ಎಕ್ಸ್ (X) ನಲ್ಲಿ ಪೋಸ್ಟ್ ಮಾಡಿರುವ ಹೆಲ್ಲೆ ಲಿಂಗ್, ಖಾತೆ ಸಸ್ಪೆಂಡ್ ಆಗುವ ಮುನ್ನ ಇಡೀ ದಿನ ತಮಗೆ ಇನ್ಸ್ಟಾಗ್ರಾಮ್ ಖಾತೆಯನ್ನು ಪ್ರವೇಶಿಸಲು ಸಾಧ್ಯವಾಗುತ್ತಿರಲಿಲ್ಲ ಎಂದು ಹೇಳಿದ್ದಾರೆ.
ತಮಗೆ ಬಂದಿರುವ ಸಸ್ಪೆನ್ಷನ್ ನೋಟಿಸ್ನ ಸ್ಕ್ರೀನ್ಶಾಟ್ ಹಂಚಿಕೊಂಡಿರುವ ಅವರು ಹೀಗೆ ಬರೆದುಕೊಂಡಿದ್ದಾರೆ. “ಪತ್ರಿಕಾ ಸ್ವಾತಂತ್ರ್ಯಕ್ಕಾಗಿ ಇದು ಒಂದು ಸಣ್ಣ ಬಹುಮಾನ, ಆದರೆ ನಾನು ಈ ಹಿಂದೆ ಎಂದಿಗೂ ಇಂತಹ ಅನುಭವವನ್ನು ಪಡೆದಿರಲಿಲ್ಲ.” ಮತ್ತೊಂದು ಪೋಸ್ಟ್ನಲ್ಲಿ ನಾರ್ವೆಯ ಈ ಪತ್ರಕರ್ತೆ, ಮೆಟಾ ಪ್ಲಾಟ್ಫಾರ್ಮ್ಗಳ ಮೂಲಕ ತಮ್ಮನ್ನು ಸಂಪರ್ಕಿಸಲು ಪ್ರಯತ್ನಿಸುತ್ತಿರುವ ಬಳಕೆದಾರರಿಗೆ ತಮ್ಮ ಇನ್ಸ್ಟಾಗ್ರಾಮ್ ಮತ್ತು ಫೇಸ್ಬುಕ್ ಖಾತೆಗಳು ಸಸ್ಪೆಂಡ್ ಆಗಿರುವ ಬಗ್ಗೆ ತಿಳಿಸಿದ್ದಾರೆ. ಅವರು ಮೆಟಾವನ್ನು ಟ್ಯಾಗ್ ಮಾಡುತ್ತಾ, “ನಾನು ಗರಿಷ್ಠ ಸಂಖ್ಯೆಯ ಭಾರತೀಯರಿಗೆ ಉತ್ತರಿಸಲು ಬಯಸಿದ್ದೆ, ಆದರೆ ಈಗ ನನ್ನ ಉತ್ತರ ತಡವಾಗಬಹುದು. ನನ್ನ ಖಾತೆಗಳು ನನಗೆ ಮರಳಿ ಸಿಗಲಿವೆ ಎಂದು ಭಾವಿಸುತ್ತೇನೆ” ಎಂದು ಬರೆದಿದ್ದಾರೆ.
ವಿವಾದದ ಹಿನ್ನೆಲೆ
ನಾರ್ವೆ ಪ್ರಧಾನಿಯವರ ಜೊತೆಗಿನ ಜಂಟಿ ಮಾಧ್ಯಮ ಸಂವಾದದ ಸಂದರ್ಭದಲ್ಲಿ ಹೆಲ್ಲೆ ಲಿಂಗ್ ಅವರು ಪಿಎಂ ಮೋದಿ ಅವರನ್ನು ಪ್ರಶ್ನಿಸಲು ಪ್ರಯತ್ನಿಸಿದಾಗ ಈ ವಿವಾದ ಪ್ರಾರಂಭವಾಯಿತು. ಭಾರತದ ಪ್ರಧಾನಿ ಕೊಠಡಿಯಿಂದ ಹೊರನಡೆಯುತ್ತಿದ್ದಾಗ, ಅವರು ಗಟ್ಟಿಯಾಗಿ, “ನೀವು ಪ್ರಪಂಚದ ಅತ್ಯಂತ ಸ್ವತಂತ್ರ ಪತ್ರಿಕಾ ಮಾಧ್ಯಮದಿಂದ ಕೆಲವು ಪ್ರಶ್ನೆಗಳನ್ನು ಏಕೆ ತೆಗೆದುಕೊಳ್ಳಬಾರದು?” ಎಂದು ಕೂಗಿದ್ದರು. ಮೋದಿಯವರು ಇದನ್ನು ಕೇಳಿಸಿಕೊಂಡಿದ್ದಾರೋ ಇಲ್ಲವೋ ಎಂಬುದು ಸ್ಪಷ್ಟವಾಗಿಲ್ಲದಿದ್ದರೂ, ಈ ವಿಡಿಯೋ ಕ್ಲಿಪ್ ಸೋಶಿಯಲ್ ಮೀಡಿಯಾದಲ್ಲಿ ತೀವ್ರವಾಗಿ ವೈರಲ್ ಆಗಿತ್ತು.
ನಂತರ ಲಿಂಗ್ ಅವರು ಎಕ್ಸ್ನಲ್ಲಿ ತಮ್ಮ ಕೆಲಸವನ್ನು ಸಮರ್ಥಿಸಿಕೊಂಡರು ಮತ್ತು ಪಿಎಂ ಮೋದಿ ತಮ್ಮ ಪ್ರಶ್ನೆಗೆ ಉತ್ತರಿಸುತ್ತಾರೆ ಎಂಬ ನಿರೀಕ್ಷೆ ತಮಗಿರಲಿಲ್ಲ ಎಂದು ಹೇಳಿದರು. ಜಾಗತಿಕ ಪತ್ರಿಕಾ ಸ್ವಾತಂತ್ರ್ಯ ಶ್ರೇಯಾಂಕವನ್ನು ಉಲ್ಲೇಖಿಸಿದ ಅವರು, ವರ್ಲ್ಡ್ ಪ್ರೆಸ್ ಫ್ರೀಡಂ ಇಂಡೆಕ್ಸ್ನಲ್ಲಿ ನಾರ್ವೆ ಅಗ್ರಸ್ಥಾನದಲ್ಲಿದ್ದರೆ, ಭಾರತ 157 ನೇ ಸ್ಥಾನದಲ್ಲಿದೆ ಎಂದು ಬರೆದಿದ್ದಾರೆ.
ಹೆಲ್ಲೆ ಲಿಂಗ್ ಪ್ರಶ್ನೆಗಳಿಗೆ ಉತ್ತರಿಸಿದ MEA (ವಿದೇಶಾಂಗ ವ್ಯವಹಾರಗಳ ಸಚಿವಾಲಯ)
ಈ ವಿಷಯದ ಕುರಿತು ವಿವಾದ ಹೆಚ್ಚಾದಾಗ, ನಾರ್ವೆಯಲ್ಲಿರುವ ಭಾರತೀಯ ರಾಯಭಾರ ಕಚೇರಿಯು ಪತ್ರಿಕಾಗೋಷ್ಠಿಯನ್ನು ಕರೆಯಿತು. ಆ ಸಂವಾದದ ಸಂದರ್ಭದಲ್ಲಿ, ಅವರು ಮತ್ತೊಮ್ಮೆ ಭಾರತದ ವಿಶ್ವಾಸಾರ್ಹತೆ ಮತ್ತು ಮಾನವ ಹಕ್ಕುಗಳ ದಾಖಲೆಗೆ ಸಂಬಂಧಿಸಿದ ಪ್ರಶ್ನೆಗಳನ್ನು ಎತ್ತಿದರು. ಇದಕ್ಕೆ ಉತ್ತರಿಸಿದ ವಿದೇಶಾಂಗ ಸಚಿವಾಲಯದ (MEA) ಕಾರ್ಯದರ್ಶಿ (ಪಶ್ಚಿಮ) ಸಿಬಿ ಜಾರ್ಜ್, ಭಾರತದ ನಾಗರಿಕತೆಯ ಇತಿಹಾಸ, ಚೆಸ್ ಮತ್ತು ಯೋಗದಂತಹ ಕೊಡುಗೆಗಳು ಹಾಗೂ ದೇಶದ ಕೋವಿಡ್ ಲಸಿಕೆ ವಿತರಣೆಯ (ಔಟ್ರೀಚ್) ಮಹತ್ವದ ಕುರಿತು ಬೆಳಕು ಚೆಲ್ಲಿದರು.
ಈ ಘಟನೆಯ ನಂತರ ಹೆಲ್ಲೆ ಲಿಂಗ್ ವಿರುದ್ಧ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿತ್ತು. ಹಲವು ಬಳಕೆದಾರರು ಅವರನ್ನು ವಿದೇಶಿ ಏಜೆಂಟ್ ಅಥವಾ ಚೀನಾದ ಪ್ರಾಕ್ಸಿ ಎಂದು ಆರೋಪಿಸಿದ್ದರು. ಇದಕ್ಕೆ ಅವರು ಸ್ಪಷ್ಟನೆಯನ್ನೂ ನೀಡಬೇಕಾಗಿ ಬಂತು.
ಎಕ್ಸ್ (X) ನಲ್ಲಿ ರಾಕೆಟ್ ವೇಗದಲ್ಲಿ ಹೆಚ್ಚಿದ ಫಾಲೋವರ್ಸ್
ಅವರು ಎಕ್ಸ್ನಲ್ಲಿ ಬರೆಯುತ್ತಾ, “ನಾನು ಎಂದಿಗೂ ಇದನ್ನು ಬರೆಯಬೇಕಾಗುತ್ತದೆ ಎಂದು ಅಂದುಕೊಂಡಿರಲಿಲ್ಲ, ಆದರೆ ನಾನು ಯಾವುದೇ ವಿದೇಶಿ ಸರ್ಕಾರದ ಪರವಾಗಿ ಬಂದಿರುವ ವಿದೇಶಿ ಗೂಢಚಾರಿಯಲ್ಲ. ಪತ್ರಿಕೋದ್ಯಮವೇ ನನ್ನ ಕೆಲಸ” ಎಂದು ಸ್ಪಷ್ಟಪಡಿಸಿದ್ದಾರೆ.
ಈ ವಿವಾದದ ನಡುವೆಯೂ ಪತ್ರಕರ್ತೆ ಹೆಲ್ಲೆ ಲಿಂಗ್ ಅವರ ಫಾಲೋವರ್ಸ್ ಸಂಖ್ಯೆ ದಿಢೀರ್ ಏರಿಕೆಯಾಗಿದೆ. ಸೋಮವಾರದ ಮೊದಲು ಎಕ್ಸ್ನಲ್ಲಿ ಅವರ ಫಾಲೋವರ್ಸ್ ಸಂಖ್ಯೆ 800 ಕ್ಕಿಂತ ಕಡಿಮೆ ಇತ್ತು, ಆದರೆ ಕೆಲವೇ ದಿನಗಳಲ್ಲಿ ಅದು 45,000 ಕ್ಕೂ ಹೆಚ್ಚು ದಾಟಿದೆ. (ಏಜೆನ್ಸಿಸ್, ಸಾಮಾಜಿಕ ಜಾಲತಾಣಗಳು)
